Google наскоро треба да ги лансира своите нови два паметни телефони со најновата верзија на Android, кои веќе нема да го носат името Nexus како досега, туку ќе се викаат Pixel – име кое во почеток се користеше за Chromebook лаптопот, а потоа и за Pixel C таблетот со дополнителна тастатура.
Новите имиња треба подобро да ја заокружат целата гама на хардверските уреди на Google, со цел тие да имаат поголеми шанси против етаблираната конкуренција. Двата планирани уреди ќе имаат големина на дисплејот од 5, односно 5,5 инчи, што ги прави конкурентни на новите iPhone-и на Apple. Телефоните ќе бидат изработени од HTC и ќе имаат карактеристичен дизајн со стакло и алуминиум во задниот дел.
Како што веќе напишавме досега, новите Pixel телефони ќе имаат прилично моќни спецификации – помалиот Pixel ќе има Snapdragon 820, 4 GB рам меморија, 32 GB простор камера со 13 мегапиксели, батерија од 2.700 mAh и дисплеј со Quad HD резолуција, додека поголемиот Marlin ќе има Snapdragon 821 (иако има информации дека ќе биде само 820-ка), 4 GB рам меморија, 32 GB простор, камера со 12 мегапиксели и поголем сензор, батерија од 3.450 mAh и исто така дисплеј со Quad HD резолуција.
Покрај новите телефони, наредниот месец Google треба да го претстави и новиот Chromecast, кој ќе поддржува 4K резолуција и нов уред за гледање и играње VR содржини наречен Daydream VR, кој треба да овозможи многу подобро искуство од Google Cardboard. Според тоа како одат работите со секој нов хардверски производ на Google, можно е заедно со уредите да биде претставена и нова верзија на Android Nougat, веројатно 7.1, која ќе донесе само ситни подобрувања.
Извор: Techno Buffalo, Tech Spot, Tech Radar
