Поради целата галама што ја дигнаа Microsoft со новиот Windows 10, Apple со новиот MacBook, но и агресивниот Google со Chrome OS оперативниот систем, малку подзаборавивме дека во компјутерскиот свет има уште еден сериозен играч од Linux сцената, а тоа е Ubuntu.
Отворениот оперативен систем и натаму добива поддршка од производителите, особено кај поевтините модели на лаптопи, а поради тоа што е целосно бесплатен за користење, што значи дека може да се купи лаптоп со подобри перформанси, а пониска цена во однос на конкурентите. Секако, кај нас оваа реалност е малку искривена, бидејќи сите што ќе купат лаптоп со Ubuntu инсталираат Windows на него (најчесто нелиценциран), но за тоа ќе зборуваме друг пат.
Новите два модели кои ги претстави Dell, доаѓаат со инсталиран Ubuntu оперативен систем и имаат супер ниски цени од 219 долари за 14 инчниот, односно 249 долари за 15 инчниот модел. И двата модели ќе можат да се опремат со Celeron N2840 или Pentium N3540 (со доплата) процесорите на Intel, како и со 2 GB или 4 GB рам меморија. Сите модели се опремени со хард диск со големина од 500 GB.
Dell Inspiron 14 3000 и Inspiron 15 3000 се опремени и со читач за SD картички, HDMI излез, USB 2.0 и 3.0, како и HD веб камера. Тастатурата и кај двата модели е со стандардна големина, со тоа што поголемиот модел има и нумеричка тастатура отстрана. Дисплеите имаат резолуција од 1366х768 пиксели, што е стандард во класата.
Со оглед на цената по која се нудат, новите модели од Inspiron серијата на Dell ќе бидат одлични лаптопи за оние кои не бараат сериозна машина и им треба компјутер за извршување обични секојдневни задачи, како сурфање на интернет и слично. Секако, тука помага и Linux оперативниот систем, кој е полесен и не бара моќен процесор и многу рам меморија за мазно работење.
Извор: PC World