Еден од најпознатите „шпекуланти“ кога е во прашање мобилната индустрија, а посебно Apple, Минг-Чи Куо, излезе со информација дека Apple се имаат премислено за откажување на SE серијата на iPhone. Куо оваа информација ја даде на почетокот од годината, но сега има нови информации.
Според него, iPhone SE 4 може да се очекува идната година, а овој модел овој пат ќе биде подобар од претходните. Во основа тој најавува дека се работи за изменета верзија од iPhone 14, што значи дека SE серијата ќе дојде со екран со големина од 6,1 инч, за разлика од последниот кој има екран со 4,7 инчи.
Уште поголема е најавата дека оваа поевтина класа на iPhone ќе дојде со OLED екран, наместо со LED, нешто што сигурно ќе привлече дополнителен број на корисници.
Исто така, iPhone SE 4 треба да дојде со чип за 5G развиен од Apple, наместо од Qualcomm, а ова е нешто што веќе одреден период се најавува, а од компанијата се’ уште се соочуваат со одредени технички проблеми пред да го пуштат нивниот чип и кај поскапите телефони.
Со промената на големината на екранот кај iPhone SE серијата, доколку овие информации се точни, се гледа дека Apple ќе се обиде повеќе директно да конкурира на пазарот од средната класа, кој моментално секако го држат Android уредите.