Не можеме да кажеме дека на корисниците им фали апликација преку која што би можеле да се гледаат со соговорниците, односно да прават видео повици. Кај нас најмногу користената апликација за ваква намена претпоставуваме дека е Skype, а сигурно се користат и Facebook Messenger и Viber.
Според неофицијални информации објавени од страна на германски блог, WhatsApp планираат наскоро да се приклучат на оваа група на апликации, директни конкуренти.
Тие во наредните неколку недели се очекува да пуштат нова верзија од апликацијата за iOS платформата која што ќе има неколку новини, од кои што главната ќе биде можноста за видео повици.
Android верзијата би требало да следи нешто подоцна, а Windows 10 не се ни спомнува.
На блогот се објавени и слики од наводниот кориснички интерфејс при видео повик, а од нив може да се види дека тој ќе биде прилично едноставен. Корисниците ќе го гледаат повикот на целиот екран, а на долната страна ќе бидат поставени сопствената слика, како и копчињата за исклучување на звукот, менување на камерата и завршување на повикот.
Покрај видео повиците, новата верзија се шпекулира дека ќе вклучува и нов начин на прикажување на повеќето разговори и промената од еден во друг. Тоа би било решено со користење на табови или нешто слично на Facebook Messenger Chat Heads.