Претплатата за Netflix која треба да биде пониска од останатите поради прикажувањето на реклами изгледа ќе чини од 7 до 9 долари. Оваа информација се’ уште е неофицијална и ја објавува Bloomberg.
Според нивните информации, првите десеттина земји кои ќе ја добијат оваа нова претплата би требало да бидат објавени до крајот на годината, додека останатите идната.
Со оглед на тоа што Netflix нема исти цени во сите земји, доколку оваа претплата биде пуштена и во нашата земја, би требало да биде пониска, со оглед на тоа што моментално најниската претплата изнесува 8 евра, а највисоката 12. За споредба, корисниците во САД плаќаат 20 долари месечно за највисоката претплата.
Партнер во прикажувањето на реклами на Netflix официјално е избран Microsoft, а корисниците се најавува дека може да очекуваат до 4 минути реклами во еден час, барем на почеток.
Исто така, оваа претплата на корисниците ќе им донесе нешто помал избор на содржина за гледање, како и немање можност за зачувување на содржина офлајн за гледање без интернет конекција.
За разлика од порано Netflix сега има доста силна конкуренција, а дел од истата веќе нуди претплата со реклами, па очекувано е дека од компанијата ќе се одлучат за ваков потег.
Сервисот исто така за првпат пријави и пад на бројот на корисници, нешто што од компанијата ќе се обидат да го решат со ограничување на бројот на корисници кои ја делат истата лозинка, а не се од истото домаќинство.