Microsoft оваа недела претстави нов онлајн сервис наменет за малите бизниси кој треба да им овозможи едноставни и бесплатни видео конференциски разговори.
Skype Meetings, кој сега за сега ќе биде достапен само за корисниците во САД, е сервис до кој се пристапува преку интернет прелистувач. Корисниците можат да креираат конференциски разговори за до 10 учесници, бројка што ќе се намали на 3 после 60 дена, преку едноставно добивање на линк којшто го испраќаат до корисниците.
При конференциските разговори достапни се одредени можности како споделување на екранот, споделување на PowerPoint презентација, контрола на звукот на сите учесници и слично.
Во основа, Skype Meetings е наменет како сервис кој треба да биде послаба и бесплатна алтернатива на Skype for Business кој им е достапен на корисниците со месечна претплата. Вториот сервис очекувано овозможува многу повеќе можности, меѓу кои и 250 учесници на еден конференциски повик.
Во САД корисниците ќе можат да се регистираат за користење на сервисот преку користење на деловна имејл адреса од компанија која нема Office 365 претплата, што и ја покажува намената на овој сервис.
Извор: Office Blogs, TechCrunch, VB
