Gmail како еден од најмногу популарните email сервиси, можеме да видиме дека активно работи на подобрување на безбедноста во комуникацијата. Веќе подолг период пораките кои што се испраќаат се преку шифриран протокол, па корисниците кои што го користат серверот можат да бидат посигурни дека некој нема да ја пресретне нивната комуникација.
Преку својот блог Google оваа недела извести дека тие во соработка со два универзитети, поточно University of Michigan и University of Illinois, имаат работено на истражување поврзано со безбедноста на email комуникацијата, односно нејзината еволуција во последните две години.
Врз основа на ова истражување имаат дојдено до заклучок дека иако комуникацијата помеѓу два Gmail корисника е шифрирана, а исто така и голем дел од комуникацијата со други email сервиси, сепак останува голем дел кој што не е.
Тие имаат дојдено до заклучок дека има региони во светот кои што работат на пресретнување на комуникацијата преку упаѓање во SSL шифрираната комуникација, како и DNS сервери кои што пренасочуваат кон малициозни страни.
За таа цел, Gmail во месеците што следат ќе започне да ги известува корисниците кога имаат добиено порака од сервис кој што не користи шифриран протокол за комуникација. Корисниците во тој случај ќе знаат да бидат повеќе внимателни отворајќи ја пораката, како и што е тоа што ќе го вратат назад, доколку сепак се работи за познат испраќач.