Netflix „конечно“ започна со неколку годишните најави за прекинување на практиката на споделување на лозинката, односно сметката со повеќе корисници. Од компанијата започнаа со наплата за еден дополнителен корисник кој не е дел од истото домаќинство во САД, а цената за тој корисник не е баш ниска и истата изнесува 8 долари месечно.
Добро е што засега нема најави за проширување на оваа новина во други земји, па и во нашата, а ќе видиме како ќе се одвиваат работите на тој план.
Конкурентот на Netflix, Amazon Prime Video, преку својот британски Twitter профил, објави слика која е директен „напад“ на новата практика на компанијата. Сликата е ставена врз одговор на објава од Netflix од 2017 година, во која тие истакнуваат дека љубов е споделување на лозинката.
Сликата е од почетниот екран на Amazon Prime Video апликацијата, односно во делот каде се бира профилот на корисникот кој ќе гледа содржина. Различните профили се заменети со зборовите „Сите кои ја имаат нашата лозинка“.
Проблемот со одлуката на Netflix е што многу корисници ја споделуваат својата сметка само помеѓу членовите од семејството кои не живеат на исто место. Прашање е кој ефект ќе го има ова и дали корисниците се спремни да почнат да плаќаат за сопствена сметка.