Дигиталните асистенти можеби не се покажаа најдобро кај паметните телефони, односно корисниците не ги користат толку многу како што се очекуваше, но тие и тоа како прават смисла во еден паметен дом. Најдобар пример за ова е Alexa на Amazon и Google Assistant на Google, кои се достапни како Bluetooth и Wi-Fi звучници и кои може да ги прашувате најразлични прашања (за времето, сообраќајот), да закажувате состаноци во календарот итн. Отсега и Cortana ќе биде достапна во слични уреди.

Разликата ќе биде што Microsoft ќе го направи китот отворен за производителите на хардвер, што значи дека можеме да очекуваме многу различни производители да почнат да прават вакви уреди. Прв ваков уред ќе биде Harman Kardon Invoke звучникот, кој ќе има вградена Cortana и кој според тоа кој го изработува, би можел да извади многу подобар звук од своите директни конкуренти од Google и Amazon. Понатаму, Microsoft соработува со HP и Intel за лансирање на повеќе уреди со Cortana.

Ова е инаку еден од начините Microsoft да ги внесе нивните одлични сервиси и во домовите на корисниците. И не само тоа – “Cortana Skills Kit” набрзо ќе почне да се вградува и во автомобилите на Nissan и BMW, каде според мене и би можела да има најдлабока примена, бидејќи е прилично моќен асистент кој може многу да помогне во олеснувањето на интеракцијата со нашите паметни уреди и сервиси додека сме во автомобилот.

Microsoft треба наскоро да лансира и SDK за Cortana, односно кит за дивелоперите, но за тоа се’ уште нема јасна временска рамка. Сепак, доколку Microsoft сака што повеќе уреди да имаат Cortana (читај кујнски уреди, машини за перење итн.), треба да го направат овој SDK достапен што поскоро. Засега, тој е достапен како приватна „бета“ верзија и тоа само за одреден број на корисници.

Извор: Venture Beat, The Next Web, Engadget

Претходна статијаNVidia Metropolis е платформа со вештачка интелигенција за „паметни градови“
Следна статијаFacebook ќе го намали прикажувањето на линкови кои водат до веб страни со ниско-квалитетно корисничко искуство