Една од главните работи за кои верувам многу корисници на Windows 10 Mobile телефоните нетрпеливо ја очекуваат Anniversary Update надградбата на својот Windows 10 компјутер е “Messaging Everywhere”, односно можноста за пишување и примање на SMS пораките од вашиот телефон директно на компјутерот. За среќа, за тоа ќе биде задолжена Skype универзалната апликација, која треба да пристигне наскоро.
Како и да е, ова е повторно удар за малиот број на корисници на паметни телефони на Microsoft – нивните очекувања повторно се залудни. Новата Skype апликација можеби ќе ја има оваа функција, но многу од корисниците на Windows 10 Mobile веројатно веќе се навикнаа на користење на Messaging апликацијата, која иако минималистичка, барем нуди Skype интеграција, без потреба да ја инсталирате апликацијата.
Ова е навистина збунувачки како и што ви делува Вам кога го читате, но навистина, Skype апликацијата сепак би можела да биде подобро решение. На пример, откако ќе ја инсталирате на вашиот паметен телефон и компјутер (се работи за иста апликација бидејќи се универзални), таа ќе почне да се грижи и за SMS и за Skype пораките.
Зошто е ова подобро? На овој начин SMS можностите на компјутер ќе ги имаат и Android корисниците, бидејќи тука оперативниот систем дозволува други апликации да го преземат менаџирањето на SMS пораките. Така, со инсталација на Skype на вашиот Android телефон, би требало да имате можност да ги добивате пораките и на вашиот Windows 10 компјутер.
“Messaging Everywhere” е инаку веќе тргнат од Build 14376, верзија на Windows 10 за Insider корисниците, досега најблиска до Anniversary Update верзијата, која за овие корисници веројатно ќе пристигне како Insider Build во наредните две недели. Според оние кои ја имаат пробано, донесува подобрена стабилност и неколку нови функции кои беа најавени, како поддршка за екстензии во Microsoft Edge, Windows Hello да може да се користи во повеќе апликации, Windows Ink за користење на електронско пенкалце итн. Официјалната надградба за компјутерите и телефоните ќе почне на 2 август.
Извор: Venture Beat, PC World, Engadget
