По „протекувањето“ на изворниот код од Windows XP, очекувано беше дека ќе почнат да излегуваат одредени информации откако кодот ќе биде разгледан и доколку сепак се најде нешто интересно.
Тоа што било пронајдено е тема за изгледот на корисничкиот интерфејс која била направена да изгледа слично како Mac OS во тоа време. Со оглед на популарноста и големата конкуренција помеѓу овие два оперативни системи во тоа време, не е чудо да од Microsoft имаат размислувано за нешто вакво.
Ова посебно е логично и кога ќе се земат во предвид информациите за „позајмувањето“ на функции од едниот или другиот оперативен систем, нешто за кое Apple водеше и цели кампањи пред да почне и со познатите кампањи за критика на Windows и неговите слабости.
Иако откриената тема се наведува дека доста наликува на Mac OS, сепак нема потврда од страна на Microsoft дали е тоа навистина така, односно дали тоа им била целта при нејзиното креирање.
На крајот, сепак Windows XP ја добива познатата сина тема, која за првпат во Windows можеше и да се промени, па корисниците имаа избор и од уште две бои, зелена и сива. Оваа верзија од Windows исто така почна да овозможува и промена на изгледот од страна на трети страни, па почнаа да се прават и посебни апликации за таа намена.
Во денешно време, Windows 10 изгледа одлично, но доколку се ископира некој дел од корисничкиот интерфејс на macOS, не би било лошо. Како и да е, од Microsoft работат на нивниот Fluent Design кој ќе направи Windows 10 да изгледа многу подобро, но уште чекаме на негова поголема имплементација, а последните промени во тоа под кого е развојот на Windows 10 дават надеж за побрзо завршување на работата.
