До пред неколку години, препораката на сите „компјутерџии“ беше да инсталирате некаков антивирусен софтвер уште веднаш откако ќе инсталирате нова верзија на Windows. Сепак, Windows 10 има вградено решение наречено Defender, кое според моето искуство одлично се справува со секојдневните закани, иако знае да се случи да има и по некој пропуст од време на време.
Овој последниот е прилично сериозен баг, кој им овозможува на хакерите да влезат во компјутерот и целосно да го преземат само со тоа што ќе му пратат мејл. И најлошо од се, корисникот не мора ни да го отвори мејлот – доволно е само тој да пристигне во мејл сандачето. Потоа, овој вирус, односно малициозен софтвер, може сам да се размножува, односно да се препрати на други компјутери.
Проблемот е во системот за заштита од малициозен софтвер вграден во Defender, кој може да се излаже да пушти цел програмски код, скенирајќи по мејл сандачињата на корисникот (нешто што го прави на секој добиен мејл).
Но, оние кои користат Defender веќе нема потреба да се грижат – Microsoft веќе пушти надградби за нивното антивирусно решение и тоа за Windows 7, 8.1, RT и 10. Проблемот е целосно решен и иако многу сериозен, тој претставувал најголем проблем за корисниците на Windows 7, кои и така најчесто користат други решенија. Доколку не сте сигурни дека сте ја добиле надградбата, проверете дали имате верзија 1.1.13704.0 на Defender и доколку немате, можете мануелно да ја инсталирате преку Windows Update.
Извор: Engadget, The Next Web, ZDNet
