На WWDC 2023 вчера, секако беше претставена и наредната верзија од iPadOS, односно iPadOS 17. Оваа верзија донесува неколку потребни промени, како и новини кои се заеднички со другите системи од компанијата.
Главната новина е поврзана со „заклучениот екран“ и е нешто што не ни е јасно зошто не беше дел од ланската верзија, кога оваа новина беше презентирана со iOS 16. Како и да е, со година дена доцнење, iPad уредите ги добиваат прилагодувањата на заклучениот екран од iPhone.
Ова значи дека корисниците ќе можат да изберат од низа на позадини директно од екранот, а тука е и можноста за избор на дизајнот, а и по ново големината на буквите на часовникот.
„Виџетите“, кои и така беа достапни со повлекување од лево, сега се достапни директно на заклучениот екран и изгледаат уште подобро од тие на iPhone, сепак iPad уредите имаат доста поголеми екрани и со тоа место за овие картички. За разлика од на iPhone, виџетите се поставуваат од левата страна на екранот.
Покрај виџетите, на iPad доаѓа и корисната Live Activities функција, за која искрено уште чекаме да добие поддршка од повеќе апликации.
Втора новина која исто така можеме да кажеме е карактеристична за стилот на функционирање на Apple, е донесувањето на Health апликацијата, дури сега. Корисниците сега ќе можат да ги гледаат статистиките и здравствените информации и од нивниот таблет, во посебно прилагоден кориснички интерфејс за големите екрани.
Виџетите на iPad, исто како и на iPhone, стануваат интерактивни, па сега тие се тука за повеќе од само прикажување на информации, односно на нив ќе може да се притисне и да се промени песната која се слуша, на пример. Интерактивни ќе бидат и виџетите кои се поставени на заклучениот екран.
iPadOS 17 ги добива новините поврзани со Messages и FaceTime апликациите, а Apple посвети посебен дел за подобрувањата поврзани со работата со PDF документи.
Деталите поврзани со iPadOS 17 на страната на Apple можете да ги погледнете тука.
