Apple денеска го одржува нивниот настан на кој стандардно се претставува наредната генерација од iPhone. На ред е iPhone 15 серијата и иако не се очекуваат некои драстични промени, сепак нив ќе ги има доволно, а посебно кај Pro моделите.
Оваа година целата серија ќе го има ланскиот Dynamic Island исечок, а во наредните неколку години Apple ќе го менува се до целосно тргање, по што ќе остане само екран.
Кај Pro моделите се очекува првиот 3nm чип од Apple, намалување на рамките околу екранот, заоблени агли на рамката од страна, користење на титаниум како материјал кој изгледа ќе биде во мат изведба, подобрување кај камерите и слично.
Покрај iPhone 15 серијата, како и секоја година можеме да ги очекуваме и новите Apple Watch верзии, оваа година и втората Ultra верзија, а тука се и новите AirPods слушалки.
Тоа што посебно ќе привлече внимание на настанот е префрлувањето на USB-C кај iPhone, нешто за кое можевме да прочитаме дека Apple ќе го презентира како нивна одлука и победа за корисниците, наместо изнудена одлука поради ЕУ.
USB-C приклучокот се очекува дека ќе дојде и кај кутијата за полнење на AirPods Pro, но не и кај основниот модел од слушалките.
Како и да е, корисниците на Apple конечно нема да мора да бараат посебен кабел за да можат да го наполнат својот телефон кога не се дома, а дома ќе можат да користат еден кабел за сите нивни уреди. MacBook уредите и iPad веќе доаѓаат со овој приклучок, па остана уште само iPhone.
Настанот ќе започне во 19 часот по македонско време, а ќе може да се гледа преку YouTube каналот од компанијата на овој линк.
