Wowhoo безжичен полнач за мобилни телефони

Од

09.04.2014 - 19:28

Со брзиот развој на технологијата константно се менува и секојдневниот начин на живот. Гаџетите станаа најважен уред, без кој многу од нас не би можеле да си го замислат денот. Со огромна заинтересиранот се користат за различни намени поради што и е многу важно батеријата да издржи низ денот. Досега имаше многу објави на оваа тема и претставени се интересни изуми и идеи кои имаат за цел да го решат овој проблем. Еден ваков изум е уникатниот и евтин безжичен полнач за мобилни телефони Wowhoo.

wowhoo-1

Wowhoo е мал модерен преносен уред со кој може да го наполните вашиот мобилен телефон безжично. За разлика од другите безжични полначи, Wowhoo се одликува со поголема брзина на полнење и многу мала димензија, тој е 50% помал во споредба со стандарден паричник. Оваа негова карактеристика дозволува да може да го носите насекаде со себе, независно дали сте во движење или на работа.

Овој полнач работи така што мобилниот уред се поставува на платформата и тој се полни преку индуктивен пренос на моќност. Но, за да функционира овој систем мобилниот телефон треба да содржи приемник, соодветен за Qi технологијата на која се базира работата на овој уред.

Qi е всушност стандард за безжичен пренос на моќност, развиен во 2008 година од страна на Wireless Power Consortium. Energizer, HTC, LG, Motorola, Nokia, Panasonic, Samsung, Toshiba, Verizon се само еден мал дел од компаниите кои членуваат во овој конзорциум. Досега оваа технологија е инсталирана во повеќе од 400 производи, a многу производители на мобилни телефони веќе ја имаат вметнато во своите уреди. Во случај, да нема поставено приемник во постарите модели на мобилни телефони, тој многу едноставно може да се постави како што е покажано на сликата.