Во најновиот неделен билтен Марк Гурман пишува на неколку теми, како на пример веќе неколку пати најавуваниот посериозен влез на Apple на пазарот на паметни домови со нови паметни екрани.
Друга тема која беше дел од овој билтен е објавата на видеа од MacBook Pro со M4, кои се’ уште не се претставени во нешто што скоро воопшто не се случува кога се во прашање Apple.
Видеата се од Русија, а сите објавени карактеристики се во рамките на очекувањата, па единствената работа која остави сомнеж за дали се вистински уредите е сликата која се користи како позадина и се менува со секоја нова генерација, а во овој случај беше истата.
Гурман тврди дека тој верува дека сепак овие видеа се вистински, односно се работи за лаптоп компјутерите кои ги очекуваме да бидат претставени на 28 овој месец.
Според него, Apple секогаш ги полни неколку од светските складишта со доволно количина пред претставувањето со цел да може веднаш да почне со продажба. Фактот што овој пат некој има дојдено до нив е сигурно поради кражба на нив од некој од складиштата, по што биле испратени кај руските објавувачи.
Ќе видиме за кратко време дали ова навистина е случајот.
