Уште со самото погледнување на неговата цилиндрична форма, многумина ќе го споредат со Mac Pro на Apple, но мора да се оддаде почит на дизајнерите на овој десктоп компјутер – тие успеале да вградат и Harman/Kardon звучник во него, кој може да продуцира звук во сите насоки наоколу.
ArtPC Pulse е инаку прилично мал компјутер, кој може лесно да се смести и на вашата маса. Има височина од 27 сантиметри, што го прави прилично компактен, а неговата циркуларна форма дозволува тој да биде вграден во многу потесни места. Изработката е инаку од алуминиум, што заедно со синото LED осветлување дава прилично луксузен печат.
Но, нека не ве залажува дизајнот – ова не е којзнае колку моќен десктоп. Тој доаѓа со Core i5 или Core i7 Skylake процесори (Intel сѐ уште ги нема лансирано Kaby Lake десктоп изведбите), 8 или 16 GB рам меморија, супер брз 256 GB NVMe SSD диск и AMD RX 460 графика. Во превод, ќе можете да ги играте сите понови игри, но не се надевајте на повисока резолуција од Full HD.
Интересно, од Samsung велат дека овој компјутер ќе биде лесен за надградба, но ако е така, веројатно ќе беше добро да го понудат куќиштето без внатрешни компоненти, па да можеме ние самите да ги избереме. На компјутерот има мноштво приклучоци, што е и очекувано од еден десктоп компјутер – HDMI, USB, USB-C, SD и Ethernet порта.
Цената на Samsung ArtPC Pulse почнува од 1.200 долари за моделот со Core i5 процесор, што очекувано е многу повеќе отколку што би платиле за ист таков компјутер доколку би го склопиле сами. Сепак, брендираните компјутери секогаш биле поскапи, а тука дополнителна придобивка е прилично привлечниот дизајн. И вградениот звучник, ако на некого му требаше тоа во еден десктоп компјутер.
Извор: ARS Technica, PC World, Windows Central
