Toshiba сигурно е име кое одамна го немате слушнато во светот на персоналните компјутери, поточно лаптоп компјутерите. Ова некогаш познато име, на врвот на пазарот, веќе со години работи послабо, па во 2018 се одлучи да поголемиот дел од својата подружница за персонални компјутери го продаде на исто така познатата компанија Sharp.
Процентот којшто го продаде тогаш Toshiba изнесуваше 80,1%, а подружницата беше преименувана во Dynabook која продолжи да функционира на пазарот, но не може да се спореди со брендот на Toshiba.
Како што истакнуваат од Toshiba во нивното известување, остатокот од 19,9% од акциите кои тие ги задржаа во Dynabook ги продадоа на Sharp, како што била оставена можноста според договорот од 2018.
Со тоа, Toshiba веќе официјално нема никаква поврзаност со бизнис кој е на пазарот на персонални компјутери, односно во случајот на овој бренд, со лаптоп компјутери.
За жал, пазарот стана таков изминатите, да речеме, 10 години, па како што е случајот и со пазарот на смартфони, така и тука, бројот на навистина успешни брендови е намален. Успеваат само тие што се во првите три места, па поретко гледаме производи од тие што се пониско на листата.
Иако тие што ги држат првите три места произведуваат одлични производи, сепак на пазарот можеби фали до некаде поголемиот избор кој беше достапен порано.
