Во мај минатата година Amazon ја купи една од најпознатите филмски компании во светот MGM – Metro Goldwyn Mayer за 8,5 милијарди долари. По одобрувањето на зделката од страна на Европската Унија и истекот на рокот во кој американската FTC може да поднесе жалба, MGM и официјално стана дел од Amazon Primer Video и Amazon Studios.
Ова слободно може да се каже дека е одлична вест која ќе им значи и на македонските гледачи на стриминг сервисите, поради значителното зголемување на содржината, а со тоа и конкурентноста на Amazon Prime Video сервисот кој е достапен веќе подолго време во Македонија.
MGM со приклучувањето на Amazon Primer Video со себе донесува повеќе од 4.000 филмови и повеќе од 17.000 епизоди од серии, 180 оскари, како и 100 Emmy награди. Дел од овие филмови и серии се познатите наслови како James Bond, Rocky, Creed, Thelma & Louise, The Silence of the Lambs, The Magnificent Seven, Raging Bull, Robocop, Stargate, The Adams Family, Legally Blond, Tomb Raider и многу други.
Сите овие ќе им станат достапни на претплатниците на Amazon Prime Video, а ако се земе во предвид искуството, може да се очекува дека веќе нема да бидат достапни на конкурентните сервиси како Netflix, HBO Max, Disney+ и другите.
„MGM има речиси вековно наследство на креирање исклучителна забавна содржина и ние ја делиме нивната посветеност да испорачаме широк список на оригинални филмови и серии до светската публика. Им посакуваме добредојде на вработените, креаторите и талентот од MGM и со нетрпение очекуваме да работиме заедно за да создадеме уште повеќе можности за донесување на квалитетно раскажување на приказни на нашите корисници.“ – истакна Мајк Хопкинс виш потпретседател на Prime Video и Amazon Studios.