Многу од нас сме зависни од информации. Постојаното ѕиркање кон телефоните и таблетите за да се провери што „ново“ дошло на Facebook како и да се сподели нешто од „огромна“ важност со другите кои никогаш не ги ни гледате во материјалниот свет е зависност на стотици милиони луѓе во целиот свет.
Ваквата зависност значително ја намалува продуктивноста, ги прави луѓето раздразнети и неспособни да држат внимание повеќе од осум секунди, им се намалува самодовербата и задоволството со сопствениот живот, им се зголемува нивото на депресија и стравот од пропуштање…
Па сепак, ретки луѓе успеваат да ги баталат уредите од своите раце и да не се ѕверат во нив постојано, дури и кога се во друштво. За да ја демонстрира драматичноста на оваа зависност и да го насочи вниманието кон оваа појава, уметникот фотограф Ерик Пикерсгил ги ретушира фотографиите кои ги прави со тоа што ги вади преносните уреди од сликата.
Крајниот резултат се луѓе кои се ѕверат во своите раце, а не си обраќаат внимание едни на други. Сликите се очекувано бизарни и според него укажуваат на погрешноста во прифаќањето на ваквиот бон-тон кој го оправдува користењето на уреди насекаде и во друштво на други луѓе, кое во основа е невоспитано и безобѕирно.
Тој вели дека многу луѓе го прашале зошто смета дека оваа појава е толку раширена, на што одговорил: „Бидејќи луѓето се ОК со сето тоа. Кога луѓето прифаќаат користење на уред во друштво на други луѓе тоа станува нормално“.
Користењето на уред (телефон, таблет…) во друштво на други луѓе е невоспитано. Вложете максимални напори тоа да не го правите, освен во случаи кога треба да дознаете информација или да извршите операција која е полезна и за тие кои се со вас. Електронската пошта ќе ве почека уште некоја минута, а мозокот ќе ви благодари што не го оптоварувате со непотребни информации.
Извор: FastCoexist, Removed.Social