Елон Маск најави дека од 15 април само корисниците кои се верификувани ќе можат да гласаат на анкетите, а овие корисниците исто така ќе бидат единствените кои ќе се прикажуваат како предлози во For you листата на новости.
Првата реакција на оваа одлука е дека ќе направи проблем со популарноста на мрежата, но Маск тврди дека ова е единствениот реален начин со кој може да се справат со ботовите со вештачка интелигенција.
Маск потоа додава дека тој нема ништо против да има ботови на мрежата, но тие треба да ги следат нејзините правила и да не имитираат луѓе.
Главниот начин да еден профил биде верификуван сега е преку плаќање на Twitter Blur претплатата. Поточно, старите ознаки веќе нема да важат, па корисниците кои биле верификувани сега ќе треба да ја плаќаат месечната претплата.
Twitter Blue претплатата чини 8 долари месечно, односно 7 доколку се плати целата година однапред. Доколку претплатата се направи преку мобилната апликација, тогаш истата чини 11 долари месечно, поради процентот кој го земаат Apple и Google.
Оваа претплата минатата недела беше пуштена во целиот свет, што значи веќе не е ограничена само во помал број на земји. Корисниците ја добиваат сината ознака која порано значеше верификуван профил на некоја позната личност, како и можност за објава на повеќе од 280 карактери, можност за измена на објавите и слично, а со тек на време треба да има повеќе функции.
Ботовите се голем проблем на мрежата, посебно тие кои имитираат вистински луѓе, а вистинската нивна бројка беше причина зошто Маск прво го одложи, па откажа купувањето на Twitter минатата година.