Растот на популарноста на Instagram, а посебно кај помладите корисници, е очигледен веќе со години. Корисниците се повеќе се одлучуваат за друштвена мрежа каде се споделуваат само слики и кратки видеа, наместо статии, текстови и слично.
Instagram ја достигна бројката од 1 милијарди корисници во 2018, осум години по почетокот со работа, а сега таа бројка е дуплирана и ја има надминато границата од 2 милијарди корисници.
Оваа информација сепак не е официјално објавена од страна на Instagram, односно Meta, па не е познато дали е навистина точна.
Информацијата ја даваат вработени во компанијата до CNBC кои побарале да останат анонимни. Според нив, границата од 2 милијарди корисници е надмината уште во октомври, недела дена пред промената на името на мајката компанија, Facebook во Meta.
За потсетување, Meta, односно тогаш Facebook, ја купи Instagram во 2012 за 1 милијарди долари.
Сигурно е чудно зошто од Meta не би се пофалиле веднаш со оваа информација. Нивната втора друштвена мрежа за само три години го дуплира бројот на корисници и покрај големата конкуренција од TikTok, од каде доаѓаат и повеќето нови функции на Instagram.
Се верува дека причината за „ќутењето“ од страна на Instagram и Meta генерално, е периодот на критики, а посебно од организациите кои тврдат дека оваа друштвена мрежа не е добра за помладите.
Како и да е, TikTok продолжува да биде сериозна конкуренција на Instagram, а бројките покажуваат дека и двете мрежи продолжуваат да функционираат одлично.
