Скопје, како што сите знаеме, е трусно подрачје, па секое чувствување и на барем мал земјотрес резултира со пребарување на страните кои нудат брзи информации, но и следење на социјалните мрежи кои веднаш се полнат со коментари.
Google оваа недела воведе нова функција која значително ќе го олесни барањето на информации во случај на земјотрес, па веќе нема да треба да ги разгледуваме повеќе страни кои се прикажани во резултатите од пребарувањето.
Google, како за многу други работи, при пребарувањето на „earthquake“, „earthquakes near me“ и слично, ќе прикаже картичка со повеќе информации за последниот земјотрес.
Картичката ќе прикажува информации како големината на земјотресот, мапа на која што ќе може да се види каде е почувствуван земјотресот, како и совети што да се прави доколку се работи за земјотрес со поголеми последици.
На мапата ќе може да се видат и информации кои ќе покажуваат каде е епицентарот на земјотресот, како и неодамнешните земјотреси во околината, па корисниците ќе знаат што може да очекуваат.
Извор: Google
