Со најновата серија на промени на Gmail сервисот, Google воведе функција која што го интегрира Google Drive сервисот со Gmail. Тоа значи дека сега сите работи поврзани со прикачени фајлови во email пораките, можете да ги правите преку Drive, наместо преку вашиот локален диск што го имате на компјутерот. Поточно оваа интеграција донесува 2 можности.
- Симнување на прикачени фајлови директно во вашиот Google Drive
Кога ќе добиете порака во која што е прикачен одреден фајл, покрај стандардната можност да го зачувате фајлот на вашиот компјутер, сега имате можност истиот да го зачувате директно во некоја од папките во вашиот Google Drive. Новата функција можете да ја познаете по иконата од Drive која се појавува до прикачените фајлови. Со притискање на истата избирате каде во вашиот Drive сакате да биде зачуван прикачениот фајл.
- Испраќање на фајлови од Google Drive директно од Gmail
Кога сакате да испратите фајл кој се наоѓа во вашиот Google Drive, наместо користење на функцијата за споделување (share), сега можете да го испратите директно од Gmail. Кога ќе притиснете на копчето за креирање на нова порака, сега во делот за прикачување на фајлови ја има иконата од Drive, па со нејзино притискање можете директно да изберете фајл. Исто така доколку фајлот што сакате да го испратите се наоѓа на вашиот компјутер, можете прво да го ставите на Drive, па тогаш да го испратите. Со прикачување на фајлот давате право на пристап до истиот на вашиот Drive исто како кога ја користите Share функцијата.
Овие функции се достапни само преку веб верзијата на Gmail, односно не можете да ги користите преку некои од апликациите кои имаат Gmail поддршка.
