После години на прилагодување и слободно може да се каже уништување на мрежата, во правец на конкурентите како TikTok, Facebook конечно ќе почне да се враќа на своите оригинални принципи.
Во основа тоа значи дека мрежата оваа година ќе претстави неколку новини кои ќе ја вратат на почетоците кога истата се користеше за поврзување на корисниците, односно пријателите, роднините и слично.
Првата промена која ја претставија од Meta е целосен редизајн на делот за пријателите, односно „Friends“ делот кој сега во главно се користи за гледање на добиените покани за пријателство и предлози за нови пријатели.
Овој дел сега ќе функционира како целосно посебна листа со новости, а очекувано, наменета само за објавите од пријателите. Корисниците преку делот за пријатели ќе можат да ги гледаат објавите од пријателите, нивните „приказни“, reels видеа, родендени, како и покани за пријателство.
Овој дел за повеќето корисници веќе е поставен на долната, односно главната лента од апликацијата, а доколку тоа не е случајот, тоа може да се направи преку „Tab bar“ делот во Settings.
Иако од компанијата планираат да се вратат делумно на нивните оригинални принципи, сепак фактот што ќе мора да се отвори овој посебен дел за да се гледаат објавите од пријателите значи дека сепак мрежата ќе остане во главно со сегашниот стил на работа, а тоа е константна препорака на нова содржина.
