Основачот на познатата компанија за паметни часовници Pebble, Ерик Мигиковски, претстави апликација која треба да ги собере повеќето познати сервиси за разговори на едно место. Beeper тоа го овозможува дури и за iMessage, иако за овој сервис потребни се одредени предуслови.
Оваа апликација е во развој подолго време и претходно го носела името NovaChat, а го користи протоколот со отворен код, Matrix. Сервисите кои може да се приклучат на Beeper се: WhatsApp, Facebook Messenger, Instagram, iMessage, Android Messages, Telegram, Twitter, Slack, Hangouts, Skype, IRC, Matrix, Discord, Signal и Beeper network.
Beeper уште не е официјално достапна, па заинтересираните корисници може да се регистрираат, но исто така треба да се знае дека апликацијата доаѓа со месечна претплата од 10 долари, што значи дека сепак неа повеќе ќе ја користат тие кои работат со овие сервиси, можеби во комбинација со доста приватни разговори.
Исто така, иако е нагласено дека може да се функционира со iMessage, сепак за тоа е потребно корисникот да поседува барем еден Apple уред, од каде Beeper апликацијата ќе се користи како основа за да може да работи на другите уреди.