OneDrive за корисниците на Android добива неколку новини од кои се гледа и соработката која Microsoft ја има со Samsung.
Главната новина е поддршката за Samsung Motion Photos кои сега може да се гледаат и преку OneDrive апликацијата на Android, односно и преку onedrive.com.
Motion Photos е функција кај одреден број на Samsung телефони која прави кратко снимање пред да се направи сликата. Снимањето е само неколку секунди, а се добива ефект на анимирана слика.
Овие слики и досега можеа да се зачуваат во OneDrive, но сега за првпат сервисот добива поддршка истите да може да се гледаат во нивната „анимирана“ форма.
OneDrive исто така добива и поддршка за пуштање на 8K видеа, нешто што исто така е резултат на соработката со Samsung од каде посебно ја истакнуваат можноста за снимање во оваа резолуција кај нивните посилни модели.
Зачувувањето на 8K видеа беше можно и досега, но корисниците сега ќе можат да ги гледаат видеата во оваа резолуција преку OneDrive, се разбира преку поддржани уреди, а тоа сега за сега во главно се телевизорите.
OneDrive добива и две новини кои не се ексклузивни за корисниците на Samsung. Па така, Home делот во апликацијата сега добива можност за прикажување на „On this day“ сликите, а покрај досегашните последно користени датотеки, се додаваат и датотеки кои се зачувани да може да се гледаат офлајн.
Сервисот на Microsoft доби и зголемување на ограничувањето на големината на датотеките кои може да се прикачат, па сега тоа изнесува 250 гигабајти. Ова е доста големо подобрување во време кога и не е ретко да се има толку големи датотеки, а посебно од професионалците.
Една функција која Microsoft ја воведе минатата година ќе се осигура дека корисниците кои работат со големи датотеки, нема да го трошат својот интернет лимит брзо, како и да чекаат многу при секоја промена. Со differential sync ќе се прикачуваат само изменетите делови од датотеката, а не целата.