По одлуката да Microsoft Edge продолжи да се развива на основа на Chromium од Google, Microsoft ќе направи уште една работа која на прелистувачот ќе треба да му даде подобра шанса да успее на пазарот.
Логото на Edge, кое поради некоја причина беше направено да биде слично со тоа на Internet Explorer, веќе нема да биде тука да ги потсетува корисниците дека „сурфаат“ со прелистувач којшто е наследник на овој „озогласен“ и застарен прелистувач.
Новото лого кое ќе се користи за Edge направен на Chromium, најверојатно кога ќе биде пуштена првата официјална верзија, е направено во стилот на новите икони кои ги користи Microsoft за нивните производи, како тие од Office, на пример.
Покрај тоа, самото лого претставува бран од океан/море, кој секако треба да асоцира на сурфање. Формата која ја креира бранот, исто така е направена да потсетува на буквата „Е“, но овој пат нема никаква слично со истата буква од претходните верзии.
Интересно, Microsoft изгледа официјално ќе го претстави новото лого оваа недела, а неговиот изглед е откриен од страна на програмери кои успеале да ја решат „загатката“ која ја имаат оставено развивачите на Edge.