Microsoft можеби нема успешен еко систем кај смартфоните (иако иднината на Windows 10 Mobile и не е така темна), но затоа има еден куп одлични апликации за Android и iOS. Со нив, тие буквално сакаат да ги заменат сите стандардни апликации на овие две платформи. Една од нив е Skype Mingo, која може целосно да замени неколку основни апликации во вашиот Android паметен телефон.

Апликацијата сѐ уште не е подготвена за генералната публика и иако ја има во Play Store, не е компатибилна со голем број на уреди, односно барем не со моите два таблети (Asus и Lenovo со Marshmallow). Причината за ова е што апликацијата е во многу рана, Alpha верзија, која сигурно е полна со багови и недовршени функционалности.

Како и да е, оваа апликација може да биде многу важна за зголемувањето на користењето на Skype и кај корисниците на Android и iOS. Според функционалностите, таа е слична на Skype Preview за Windows 10 и Windows 10 Mobile. Тоа значи дека преку неа ќе може да се праќаат SMS пораки (од бројот на телефонот и преку Skype кредит), да се вршат повици и да се разговара со ботови.

Иако не е назначено, сигурен сум дека доколку ја имате инсталирано оваа апликација, ќе може да праќате SMS пораки и од вашиот компјутер, а преку сметката на вашиот телефонски број, што е особено корисно за луѓе кои големиот дел од времето го поминуваат работејќи пред поголемите компјутерски дисплеи. Засега оваа можност е достапна само со Skype Preview за Windows.

Извор: Android Central, Tech Crunch, MS Power User

Претходна статијаДостапна Super Mario Run – новата игра од Nintendo за iPhone и iPad
Следна статијаHoloActive Touch – виртуелен екран во новите модели на BMW