Parallels Desktop 9 е програма за виртуелизација, односно креирање на виртуелни машини на OS X. Преку неа може да подигнете инсталации на Windows, Linux и Chrome OS на вашиот Mac компјутер. Доколку не сте запознаени со програмите за виртуелизација, истите креираат виртуелна средина во вашиот оперативен систем, користат од ресурсите на компјутерот и инсталираат друг оперативен систем внатре во постоечкиот. Новиот оперативен систем функционира како и секоја друга програма и не се инсталира како посебен оперативен систем на дискот.
Новата верзија на Parallels Desktop донесува поддршка за OS X Mavericks, како и поддршка за инсталација на Windows 8.1. Parallels Desktop автоматски ги детектира фајловите (ISO/DMG) од оперативните системи што ги имате на вашиот диск, флеш драјв или CD/DVD, па лесно можете да започнете со инсталација. Исто така инсталацијата на Windows 8.1 (бета верзија) е интегрирана во самата програма и истата генерира лиценца, па инсталацијата е доста лесна и брза.
Parallels Desktop има неколку интересни функции што го прават користењето на Windows пофункционално. Програмите Start8 и ModernMix се интегрирани со инсталацијата и функцијата што ја извршуваат со оваа виртуелна машина е наречена Windows 7 Look. Со користење на Windows 7 Look добивате Старт Копче и можност за користење на Windows 8 апликациите во намален прозорец во десктоп околината. Исто така Parallel има поддршка за iCloud, Dropbox, Google Drive, Photostream и SkyDrive, па папките на овие сервиси се појавуваат и во File Manager-от на Windows. Доколку работите со истите фајлови, Parallels го детектира истото, па нема да дозволи да се направат дупликати од истите. Parallels ја користи новата можност на OS X Mavericks за повеќе монитори, па можете да работите со вашиот Mac десктоп на еден монитор и со Windows 8 на целиот екран на друг монитор.
Новата верзија исто така доаѓа со зголемени перформанси, па според програмерите истите се:
40% подобри перформанси на дискот, 25% побрзо гасење на вритуелната машина, 15% подобри 3D графички перформанси и сурфање на интернет.
Цената на Parallels Desktop 9 e $79.99 за сите нови корисници и $49.99 доколку правите надградба од претходната верзија.