Telegram е една од најпознатите апликации за разговори во светот, а тоа посебно доаѓа до израз во ситуации кога е потребна тајна комуникација. Покрај ова, сите што ја имаат пробано апликацијата имаат забележано брзината со која истата работи, нешто што скоро и не се споредува со ниту една од конкурентните.
Според засега неофицијални информации, Telegram можно е да добие претплата со која корисниците би добиле нешто повеќе функции од сега достапните.
Telegram Premium би било името на посебната претплата, а корисниците кои ја плаќаат би имале пристап од повеќе „стикери“ и „реакции“ за разговорите.
Можеби за некои доплатата за добивање на стикери и реакции не е нешто привлечно, но сепак од компанијата мора од нешто да заработат за да продолжат со функционирање, а ваков модел е доста подобар од моделот на реклами кој е доста критикуван изминатите години, посебно кога е во прашање приватноста на корисниците.