Internet Explorer веќе одамна не се користи од поголемиот број од корисниците, а Microsoft пушти и неколку надградби на Windows 10 со кои овој прелистувач беше тргнат.
Сепак, ова не значеше и крај на Internet Explorer кој продолжи да биде достапен кај одредени корисници, но и на тоа му доаѓа крајот на 14 февруари, односно утре.
Во текот на утрешниот ден, Microsoft ќе пушти надградба на Microsoft Edge на Windows 10 со која целосно ќе го тргне Internet Explorer од компјутерите. Притискањето на уште достапната икона од овој прелистувач ќе го отвори Edge, а од ова лето ќе бидат тргнати и последните знаци од IE во секоја форма.
Дополнително, со оглед на тоа што минатиот месец заврши поддршката за Windows 7 и Windows 8/8.1, утре овие системи нема да бидат дел од безбедносните надградби кои стандардно се пуштаат во вторник. Поддршката кај овие системи е завршена и за Microsoft Edge и Google Chrome.
Корисниците на Windows 10 кои веќе нема да го имаат Internet Explorer од утре, ќе можат да продолжат да ги користат своите постари веб апликации преку IE режимот во Microsoft Edge.
Според информациите, по утрешната надградба, сите информации од Internet Explorer ќе бидат префрлени на Microsoft Edge, па корисниците би требало да можат да продолжат да функционираат без некои посебни проблеми.
