Microsoft ја најави „Microsoft Store August 2024 update“ која ќе им стане прво достапна на корисниците на Windows Insider програмата во dev и canary каналите. За сите корисниците изгледа може да се очекува во есен со пуштањето на поголемата Windows 11 надградба за годината.
Microsoft Store, продавницата за апликации на Windows 11 добива неколку новини кои иако се мали, се доста корисни и барани од страна на корисниците. Тоа посебно важи за една од новините.
Првата промена доаѓа кај Library делот каде сега корисниците можат да ги видат сите нивни апликации, не само тие кои се во моментот и на тој уред инсталирани. Тоа значи и подобрување за филтрите кои се достапни на горната страна, а сега е додадена и лента за пребарување само за овој дел.
Втората новина, која исто така е до некаде поврзан со Library е таа која ја прави главната разлика кај оваа надградба на Microsoft Store. Ажурирањето на апликациите веќе не е дел од Library, па продавницата добива посебен дел само за таа намена наречен „Updates & downloads“.
Во овој дел корисниците ќе можат да ги видат апликациите кои моментално се симнуваат, како и ажурираните верзиите од инсталираните апликации.
Најважно од се, апликациите кои имаат ажурирана верзија сега ќе прикажуваат и информации за новата верзија, односно „changelog“. Секако, програмерите ќе мора да ги внесуваат информациите за да овој дел биде корисен.
