Microsoft Teams доста брзо се проби на пазарот. Очекувано, тоа во голем дел се должи на ресурсите кои ги вложи компанијата во овој сервис, но исто така и поради достапноста на апликацијата без дополнителна претплата како дел од Microsoft 365 пакетот.
Ова е јасно зошто не им се допаѓа на конкурентите кои наеднаш добија доста силен конкурент кој за огромен број на корисници не чини ништо, додека нивните сервиси мора да се платат.
Според информации од Financial Times, Microsoft можно е да престане да ја вклучува Teams апликацијата бесплатно како дел од Microsoft 365 пакетот, па истата да може да се користи посебно или со дополнителна претплата.
Деталите околу можното одвојување на Microsoft Teams од бизнис пакетот се’ уште не се целосно одлучени, па доколку навистина дојде до тоа, може да претставува доста голема промена за компаниите.
Оваа одлука од страна на Microsoft се договара со Европската Унија која сака да започне со антимонополска истрага, нешто кое го бараат и конкурентите како Slack. Дали ќе дојде до некаков договор и што ќе се случува, ќе мора да видиме кога работите ќе станат официјални.
