Google во тест верзиите од Chrome започна со тестирање на можност за оставање на белешки на веб страните. Ова може да се гледа како на еден додаток на омилените веб страни, како и едноставна алтернатива на Collections функцијата во Microsoft Edge.
Во основа, корисниците ќе можат да притиснат со десното копче на било која веб страна, па на новата можност во менито наречена „Notes“, односно белешки. Со тоа ќе им се отвори посебна лента на десната страна од прелистувачот каде што ќе можат да внесат едноставно белешка, односно текст.
Сите белешки ќе бидат достапни во листа на лентата која ќе се отвора на десната страна, а корисниците ќе можат да ја видат белешката оставена на моментално отворената страна или да ги видат сите белешки.
Оваа новина е одлична кога се истражува нешто, па ќе се остави белешка која би ја содржела главната поента која ја има на таа страна, на пример. Корисниците на тој начин лесно ќе ги пронајдат зачуваните страни, но со кратко „потсетување“ зошто истите биле зачувани и кој е главниот дел од нив.
Во оваа тест фаза не е можно оставање белешки на конкретен дел од страните, но ќе видиме дали функцијата ќе добие некои нови можности до официјалното пуштање во некоја од идните верзии од Chrome.
Верзијата од Chrome во која се тестира оваа функција е 113 и истата мора да се вклучи преку chrome://flags/#power-bookmark-backend и chrome://flags/#user-notes-side-panel.
