RCS – Rich Communication Services, е модерната замена на Google за стариот SMS. Корисниците сега можат да комуницираат со модерни функции, како ознака дека пораката е прочитана, ознака дека другата страна пишува, испраќање слики и слично, а сето тоа преку интернет конекцијата на уредот и апликацијата за SMS. Кога не е достапна интернет конекција или кога другата страна не користи RCS систем, пораките автоматски се испраќаат како SMS пораки.
Google Messages, како и Samsung Messages веќе ја имаат поддршката за овој систем, а во нашата земја двата најголеми оператори го направија својот дел, па корисниците можат да го користат RCS системот.
Една „маана“ која остана кај овој систем, а вниманието беше насочено кон Google и нивната апликација Messages, беше недостатокот на шифрирани разговори кои ќе ја заштитат содржината од пресретнување. Оваа функција беше најавена од Google уште минатата година, па стана и достапна во бета верзијата од Messages.
Сега „end-to-end encryption“ функцијата им станува достапна на сите корисници, а тоа изгледа како и обично ќе се случи постепено во периодот што следи. Корисниците ќе знаат дека ја имаат добиено функцијата преку појавувањето на иконата од катанец во разговорите, како и на копчето за испраќање на пораката.
Од крај до крај шифрираните разговори нудат заштита на пораките и не дозволуваат никој да може да ја прочита содржината, освен страната за кого е наменета, ниту операторот, ниту Google.
За почеток шифрирани ќе бидат еден на еден разговорите, но нема да бидат групните пораки.