Тоа што е AirDrop за корисниците на Apple, за корисниците на Google и другите Android ппроизводители е Nearby Share. Оваа функција беше претставена во 2020 година, а минатата година доби и апликација за Windows со што споделувањето на датотеките помеѓу уредите беше проширено и со компјутерите.
Со оглед на големината на Samsung, односно бројот на корисници на нивните уреди, не изненадува што тие имаат посебно решение, а истото беше и потребно пред Google да го среди доволно своето.
Quick Share од Samsung сега станува официјалното име кое ќе се користи и од страна на Google. Од компанијата ја ребрендираат својата Nearby Share во соработка со Samsung, па корисниците на Android сега ќе имаат едно решение.
Ова е добра промена посебно за корисниците на Samsung кои досега имаа избор помеѓу двете решенија, па сега ќе имаат едно унифицирано.
Што се однесува до функциите достапни во Nearby Share, остануваат исти со ребрендирањето, односно со Quick Share.
„Соработувајќи со Samsung, го спојуваме најдоброто од нашите решенија за споделување во едно единствено решение меѓу Android под името Quick Share. Ги интегриравме искуствата и ја создадовме најдобрата стандардна, вградена опција за peer-to-peer споделување содржина на сите видови уреди во екосистемите Android и Chromebook. И за да го направиме споделувањето уште понепречено помеѓу уредите, соработуваме со водечките производители на компјутери како LG за да го прошириме Quick Share на компјутерите со Windows како претходно инсталирана апликација.“ – истакнуваат од Google.
