Google Chrome од почетокот на идната година веќе нема да има поддршка за корисниците на постарите системи од Microsoft, поточно Windows 7 и Windows 8/8.1.
Оваа информација ја објави Google и најави дека Chrome 110, која ќе биде пуштена на 7 февруари идната година, ќе биде и последната верзија од прелистувачот која ќе функционира на наведените верзии од Windows.
Chrome нема да престане да функционира на овие системи, корисниците ќе може да продолжат да го користат прелистувачот, но тој веќе нема да добива нови верзии, како и безбедносни надградби.
Од Google препорачуваат корисниците да се префрлат на некоја од поддржаните верзии од Windows, односно Windows 10 и 11, но за корисниците кои се останати на постарите верзии, тоа може да не е така лесно прифатлива одлука.
Завршувањето на поддршката на Google Chrome е направена да се поклопи со завршувањето на поддршката за овие системи од страна на Microsoft.
Продолжената поддршка за Windows 7 и Windows 8.1 завршува на 10 јануари идната година, па корисниците треба да го земат и тоа во предвид.
