Доколку при испраќање на имејл порака преку Gmail, во последен момент забележите некоја грешка или се сетите дека имате заборавено да прикачите или допишете нешто, веќе неколку години ја имате можноста да ја „вратите“ пораката назад. Gmail тоа го прави преку своите сервери, а доколку пораката е испратена на друг сервис, преку одложување на испраќањето, со што пораката може да биде откажана.
Оваа можност чудно беше што со години не беше овозможена за корисниците на Gmail за мобилните, а посебно што Inbox од Gmail ја има од самиот почеток. Како и да е, Google конечно реши оваа корисна функција да ја донесе и на мобилната верзија од Gmail, моментално на Android, па корисниците ќе можат да ги откажат во последен момент пораките и од својот мобилен телефон.
Инаку, оваа можност функционира на тој начин што кога пораката ќе биде испратена, корисниците имаат простор од 10 секунди во кој период им е достапно „undo“ копче кое ќе го откаже праќањето на пораката.
Според информациите, оваа функција е достапна за Gmail 8.7 и понова верзија, а можно е Google промената да ја прави од страна на серверите, па не сите корисници со оваа верзија веднаш ќе ја имаат.
