Firefox прелистувачот од Mozilla, кој иако продолжува да го губи пазарното учество, останува еден од најдобрите на пазарот, оваа недела ја доби својата 91ва верзија. Оваа верзија, како и секогаш, е достапна за сите платформи каде е достапен прелистувачот, па корисниците можат да го ажурираат, ако тоа веќе автоматски не е направено.
Mozilla се познати по функциите поврзани со приватноста на корисниците, па најновата верзија од Firefox донесува новини поврзани со тоа. Кога се сурфа во приватен режим, HTTPS конекциите ќе се отвораат стандардно, дури и кога е напишан или кликнат линк со HTTP протоколот.
Отворањето на HTTPS верзијата од некоја страна не е гаранција дека делови од истата нема да бидат без заштитениот протокол, но се верува дека сепак повеќето страни се целосно заштитени.
Втората новина поврзана со приватноста е надоградба на Total Cookie Protection функцијата која Mozilla ја воведе на почетокот од оваа година. Кога корисниците го имаат вклучено „Strict“ нивото на заштита, при бришење на колачињата и другите податоци за одредена страна, Firefox ќе ги избрише и колачињата од другите страни, не само од тој домен.
Тоа значи дека Firefox ќе ги избрише и колачињата кои се поставени за следење на активноста, со што ќе се спречи континуираното следење на корисниците.
Уште една новина ќе ги интересира корисниците на Windows. Firefox 91 добива поддршка за Windows Singla sign on функцијата, односно корисниците кои се најавени на Windows 10 со нивната Microsoft сметка, ќе можат да се најават на Microsoft страните автоматски, како што е тоа можност со Microsoft Edge.
