Arc прелистувачот, кој започна како ексклузивно достапен само за корисниците на Apple, е една од најинтересните вакви апликации на пазарот. Направен во целосно различен стил од стандардните прелистувачи, Arc е замислен за корисниците кои доста активно работат преку нивниот прелистувач и отвораат голем број на различни „табови“.
Chrome се обиде да им „помогне“ на ваквите корисници со додавање на групи на „табови“, но Arc ја носи продуктивност на наредно ниво, а покрај тоа има уште неколку доста мали и корисни функции.
По пуштањето на Windows верзијата од Arc во април оваа година, сега мобилната верзија од прелистувачот им станува достапна и на Android корисниците.
Исто како што е случајот со десктоп верзијата, така и мобилната не е наменета баш за обичниот корисник. „Сурфањето“ преку Arc Search, како што е името на мобилната верзија, е замислено да биде во правец на пребарување на одредени работи. Прелистувачот ќе ги побара работите „во име“ на корисникот и ќе му ги прикаже резултатите. Оваа функција е наречена „Browser for me“ и е можеби главната која го карактеризира прелистувачот.

Arc Search во основа функционира на генеративна вештачка интелигенција, па повеќето од функциите доаѓаат поради истата. Прелистувачот може да сумира страни, да споредува работи и генерално да дава одговори.
Интересно е што мобилната верзија од Arc може да се каже дека „нема врска“ со десктоп верзијата, односно е целосно различен вид на прелистувач.
Апликацијата е достапна преку Play Store, односно преку овој линк.