Microsoft минатата година најави дека неколку апликации од Apple ќе станат достапни на Windows, па еве сега ги гледаме првите тест верзии од тие апликации. Достапни се Apple Music, Apple TV и Apple Devices, но за почеток само за корисниците во САД. Кога ќе бидат пуштени официјалните, односно финалните верзии од апликациите, истите треба да им станат достапни на сите корисници.
Од трите апликации, Apple TV не е важна за нашата земја затоа што делот од апликацијата кој овозможува гледање на филмови и серии, уште не е достапен тука.
Како и да е, апликациите се направени на основа на кодот којшто се користи за правење апликации на Windows, односно не се само прилагодени верзии од некоја друга апликација или веб апликација. Тоа значи дека Apple овозможи одлично развиени апликации кои корисниците ќе вреди да ги користат.
Досега за слушање на Apple Music сервисот требаше да се користи старата iTunes апликација или да се слуша преку веб. Сега корисниците ќе добијат корисничко искуство скоро како да се на Mac компјутер.
Apple Devices апликацијата во основа овозможува преглед на уредите кои се поврзани со Apple сметката и нивно едноставно менаџирање.
Нема информации кога овие апликации ќе излезат од тест фазата и кога ќе им станат достапни на сите корисници во светот, но сепак веруваме дека тоа ќе се случи во месеците што следат.