Почетокот на новиот Bing не помина без проблеми, иако тие може да се каже дека не се неочекувани, посебно за познавачите на јазичните модели и вештачката интелигенција.
Microsoft објасни дека проблемите со Bing, односно разговорите со пребарувачот, настануваат кога тие се долги, а бројката која беше истакната беше повеќе од 15 прашања. Над оваа бројка Bing почнува да се повторува, да не ги разбира како што треба прашањата, а имаше и случаеви каде пребарувачот почнува да е некултурен, па дури и нападен.
Поради ова, Microsoft ја ограничи интеракцијата со Bing, па сега корисниците ќе можат да имаат до пет „реда“ на разговор, вклучувајќи ги и одговорите на Bing, по што ќе треба да се почне нов разговор. Во текот на денот бројката исто така ќе биде ограничена, па корисниците ќе можат да имаат интеракција до 50 реда со Bing.
Од компанијата истакнуваат дека нивните податоци покажуваат дека повеќето корисници го наоѓаат саканиот одговор во рамките на ова ограничување, а само 1% од разговорите траеле над 50 пораки.
Доколку корисниците се обидат да разговараат повеќе со Bing, тој ќе им каже дека веќе не може да разговара, па ќе мора да почнат нов разговор.
Новиот Bing се’ уште е во своите почетоци, па со тек на време се очекува подобрување на способностите и намалување на можните проблеми.