Се прашувавме какви се плановите во Apple, ако воопшто ги има, во оваа „трка“ на што поголема интеграција на генеративната вештачка интелигенција, која во главно ја водат OpenAI, Microsoft и Google.
Познатата компанија од Купертино секако нема да остане надвор од овој тренд, а тоа се гледа од повеќе огласи за работа кои се објавени од нив.
Бројот на објавени работни места е прилично голем и достигнува бројка од скоро 90. Во нив може да се видат различни типови на места, а се истакнуваат тие во кои се споменува генеративната вештачка интелигенција, јазичните модели и слично.
Како и секогаш, Apple се доста тајни кога се во прашање нивните производи, а и секогаш „доцнат“ на пазарот, па потоа претставуваат доста подобра и пофункционална верзија од нешто.
Грешките и проблемите кои се јавуваат со вештачката интелигенција, сигурно не се нешто кое би сакале да биде дел од нивните производи, па како што истакна неодамна Тим Кук, тие претпазливо ќе настапат.
Дополнително, се верува дека развојот на вештачката интелигенција не е само за нивните производи. Тие им забранија на своите вработени да користат алатки како ChatGPT, па очекувано е дека би сакале да имаат свои. Овие алатки се доста корисни и сигурно нема да има компанија, а посебно вака голема, која не би ги искористила предностите кои ги донесува вештачката интелигенција.
