Ракот е една од модерните епидемии која изгледа дека се зголемува во бројност како што ни се овозможуваат условите да живееме подолго и поквалитетно. За многу од човековите проблеми со органите и ткивата има решение: вештачко срце, црн дроб, панкреас, бубрези (дијализа), па дури имаме и замена на нашите очи и уши. Но ракот засега го немаме под контрола бидејќи тој не е една болест – тој претставува кумулативен резултат на заболена ДНК.
Во нашиот организам постојано се одвива војна помеѓу имунитетот и клетките кои од време на време развиваат мутации во својата ДНК и стануваат заболени. Но некогаш имунитетниот систем не успева да ги забележи и да ги уништи на време, што им овозможува да се рашират и вмножат до толку што веќе не се под контрола – и ние добиваме рак. Логичниот одговор на ова би било дека треба да работиме на подобрување на нашиот имунитет и генералниот квалитет на живеење, но најновата статистичка студија вели дека нашите напори за здраво живеење придонесуваат за подобрување на 1/3 од сите случаи на рак. Според истата, останатите 2/3 се резултат на „случајност“ – случајно настанување на лоши мутации во ДНК од кои резултира рак.
Ова е резултатот на статистичката анализа направена од Кристијан Томазети и Берт Вогелштајн од Џон Хопкинс Универзитетот по медицина и Џон Хопкинс Кимел центарот за рак. Според нив: „Долговечноста без рак кај луѓе кои се изложени на агенси кои предизвикуваат рак, како тутунот, често се доделува на нивните „добри гени“, но вистината е дека повеќето од нив едноставно имале среќа“. Практично, според нив, колку повеќе некоја клетка се дели толку повеќе постојат шанси да се развие негативна мутација. Тоа доведува до концептот дека сите оние ткива кои почесто се обновуваат имаат поголем ризик за развивање на рак, што според нив е токму така: рак на белите дробови и на кожата (меланом) се едни од најзастапените воопшто.
„Студијата покажува дека можеш да додадеш на сопствениот ризик за добивање рак со пушење или со други лоши начини на живеење. Но и покрај тоа, многу форми на рак се резултат генерално на лоша среќа на здобивање на мутација во некој ген предизвикувач на рак без разлика на тоа како живеете или на наследните фактори. Најдобриот начин да се уништат овие фактори е преку рано откривање, кога се` уште можат да се излечат преку операција“.
Секако, ова не значи дека треба да го занемарите здравиот живот – сепак 1/3 од случаите на рак според оваа студија се резултат на истото, што воопшто не е мал процент. Но изгледа дека авторите не го земале предвид фактот што многу од агенсите кои предизвикуваат рак можат да влијаат на шансите за „случајна“ мутација во оние 2/3 од случаите. Ваквата студија укажува на тоа дека треба да следат уште повеќе студии кои ќе го потврдат или порекнат резултатот од оваа, како и на тоа дека мора да се заложиме за супербрзо откривање на ракот во случаите кога тој не зависи од нас и колку квалитетен живот живееме. Еден чекор кон истото е rHealth, уред кој може да открие огромен извор на болести и негативни појави во организмот за само 15 минути преку доставување на капка крв.
Кога се работи на полето на лечење од рак, веќе медицината разгледува опции на лечење со неагресивни инванзивни и неинванзивни методи како нано роботчиња, осветлување на клетките заболени од рак, „топење“ на клетките заболени од рак со помош на позлатени молекули и тн. за кои често пишуваме на Смартпортал. Да се надеваме дека ќе најдеме начин како да ја маргинализираме оваа епидемија наскоро, бидејќи изгледа дека ќе се претвори во главната причина за нашата смртност.
Извор: IFScience, ScienceMag
Фото: dream designs / freedigitalphotos.net
