Raspberry Pi е најуспешниот мини компјутер на пазарот од едноставна причина што е многу лесен за користење и исклучително евтин. Сепак, многу корисници сакаат повеќе од перформансите кои тој може да ги понуди и за нив, Asus го лансира Tinker Board, кој има многу подобри перформанси од својот главен конкурент.

Како пример за тоа колку моќни перформанси има, Asus ја истакнува можноста за репродукција на Ultra HD 4K видео, што е невозможно со слабиот процесор на Raspberry Pi компјутерите. Tinker Board има прилично моќен процесор со четири ARM Cortex-A17 јадра кои работат на 1,8 GHz и “dual channel” рам меморија од 2 GB, која дозволува малку поголема слобода.

Компјутерот е опремен и со HDMI 2.0 порта која поддржува дисплеи со 4K резолуција при 60 Hz, како и LAN, Wi-Fi и Bluetooth конекција. Ова се прилично моќни спецификации за еден мини компјутер, особено кога ќе го споредиме со конкурентите. Сепак, следствено на ова и неговата цена ќе биде повисока – околу 70 долари. Ова е скоро двојно повеќе од Raspberry Pi 3.

Asus Tinker Board доаѓа со вградена Linux Debian дистрибуција и има вграден приклучок со 40 пинови, што значи дека лесно може да се приклучи со Internet of Things уреди, за кои и ќе биде главно наменет. Секако, корисникот на него може да инсталира и други оперативни системи или пак да го користи како тест компјутер за програмирање и испробување на нови кодови.

Извор: The Next Web, 9 to 5 Toys, ARS Technica

Претходна статијаНајголемата нафтена компанија ќе вложи 5 милијарди долари во обновлива енергија
Следна статијаКина ќе користи дронови за помош при земјотреси