Пред некој ден излезе интересен извештај на една од најголемите банки во Европа – DeutcheBank.
Мала дигресија.
Дојче Банк имаат многу добар тим на истражувачи кои очигледно е дека имаат добро познавање и од Австриската економска школа и криптовалутите, па редовно објавуваат оригинални истражувања кои не се стандардни корпоративни „пејпери“. Следете ги ако ве интересира fintech областа.
Последниот документ е всушност обид на нивниот тим да шпекулираат кои идеи ќе бидат доминантни во 2030 година, а сепак имаат линк со сегашноста. Обработуваат 24 концепти – од предизвикот со населението кое старее глобално и ефектите кои ова ќе ги има врз здравството и пензиските фондови, одговорите на климатските промени, квантни компјутери, итн. Но најинтересниот дел кој привлече внимание многу помеѓу крипто ентузијастите е самиот почеток на извештајот.
Имено, Извештајот почнува со поглавје насловено „End of the fiat money?”. Jim Reid го отвора прашањето дали криптовалутите целосно ќе ја сменат природата на парите и ќе ги заменат „парите без покритие“, односно државно гарантираните пари.
Имајте предвид дека овој концепт на пари е релативно нов феномен, односно постои од 1970 година кога САД раскрстува со (полу) златниот стандард и ја одвојува вредноста на парите од вредноста на златото.
Jim објаснува како постојниот монетарен систем создаде зависност од политика на лесни пари и ниски каматни стапки од која тешко ќе биде да се излезе без сериозни политички и економски турбуленции. Но, другата страна на паричката е што алтернативата е повисока инфлација која засега е ниска поради глобални структурни влијанија (пр. 40 годишниот тренд на намалување на учеството на трудот во финалната поделба на колачот на сметка на капиталот и технологијата). Поточно:
Порано или подоцна, возможно е инфлацијата да стане инхерентна на нашиот систем и [луѓето] да почнат да се сомневаат во одржливоста на постојниот систем [на пари без покритие]. Како резултат, побарувачката за алтернативни валути ќе биде значително поголема околу 2030-тите. Дали постојниот систем ќе ја преживеЕ политичката дилема со која ќе се соочат властите при обидот да се балансираат повисоките приноси со рекордното ниво на долг? Ова е прашањето на декадата пред нас за мулти-милијарди долари (или биткоини).
Ако (кога?) дојде овој момент, криптовалутите или златото ќе бидат една од можните алтернативи.
