Ќе си рече човек дека после она што го направи Едвард Сноуден, НСА ќе бидат мотивирани да ги затегнат безбедносните процедури во својата организација и да не дозволат да се случи нешто слично во иднина.
Меѓутоа, ако се верува на последните извештаи, тие не го сториле тоа, и вратата е отворена за сличен инцидент.
Канцеларијата на генералниот инспектор во НСА објавил ревизорски извештај во кој е наведено дека дупките во безбедноста кои постојат уште од „ерата на Сноуден“ се’ уште не се адресирани. Една таква мерка која не е целосно имплементирана е т.н. „two person access control“ според која пристапот на едно лице до сензитивни информации во НСА мора да биде авторизиран од друго лице.
Она што е уште позачудувачки е тоа што НСА очигледно не ги проверува темелно усб стиковите за вируси и малвери. Исто така, нивните планови за безбедност се или „недовршени“ или „неточни“. Вчудоневидувачки за една организација која треба да ја гарантира безбедноста на стотици милиони луѓе.
Поради ова, НСА е ранлива на хакерски напади и повторување на фијаското што им се случи со Сноуден во 2013 година. Всушност, неодамна беше откриен и сличен случај (во помали размери) при што беше објавено дека голем број на податоци од НСА биле преземени од едно лице и предадени на The Intercept. Информациите наводно ја докажуваат вмешаноста на руските безбедносни служби во претседателските избори во 2016 година.
Да сумираме: откако во 2013 година Сноуден објави милиони документи во кои се открива како НСА ги шпионира граѓаните на САД и на многу други земји, НСА не презема ништо за да спречи такво нешто да се случи во иднина. Нивната безбедносна процедура е еднаква на таа што ја имплементира 18-годишник што го отстранува усб-то без да кликне „eject“.
Изгледа луѓето што работат во НСА се навистина толку наивни како во оваа сцена од „Сноуден“.