Компанијата позади Pokémon GO, Niantic, неодамна најави дека работи на нова игра – Harry Potter: Wizards Unite. Играта се планира да биде пуштена годинава. Ова се должи на успехот на претходно лансираната апликација, Pokémon GO. Таа доживеа огромна популарност во светски рамки. Според TechCrunch, играта ќе биде направена во соработка со Warner Bros Interactive.
Едно е сигурно: сите деца кои пораснаа со Harry Potter со нетрпение ја очекуваат играта. Без оглед дали доаѓаат од Македонија или некаде од светот. Можноста да се притисне копчето за спуштање на апликацијата од Playstore и да се “фрлаат” магии со помош на смартфонот е непроценлива.
Оваа објава е јасна индикација за успехот на AR апликациите. Всушност, кога ќе размислам подобро, сметам дека дојде многу интересен момент во ИТ светот. Сведоци сме на судирот помеѓу аугментирана и виртуелна реалност, попознати како AR и VR.
Кога првпат излезе Pokémon GO, доживеа огромна популарност. Без оглед кое е вашето мислење на оваа тема, факт е дека играта беше и сеуште е бум. Го освои рекордот на најспуштана мобилна игра на App Store и Playstore. Попрецизно, станува збор за преку 750 милиони спуштања и оствари приходи од преку 1.2 билион долари. Како и да е, Harry Potter е далеку попопуларен и помоќен бренд од Pokémon. Бар кога станува збор за европско ниво. Оттука се поставува прашањето: дали со Harry Potter Wizards Unite ќе видиме нешто посебно?
Интересно е да се потенцира дека Apple не учествува во една од најголемите борби да се освои вниманието на потрошувачите во консумерската технологија. Големите компании како Facebook, Samsung, Microsoft и Google веќе лансираа свои VR продукти. Главниот човек на Apple, Tim Cook, призна дека овој пазар е многу атрактивен. Сеедно, тој не откри детали за можното инволвирање на нивната компанија во оваа индустрија.
Без оглед на тоа колку е популарна оваа тема кај компаниите, факт е дека AR и VR доживеаа огромна експанзија. Јас верувам дека многу фанови на Pokémon GO ќе бидат фанови и на Harry Potter играта. Што е уште поважно, токму овие играчи ќе бидат првите кои ќе ја прифатат апликацијата. Токму тие ќе ја промовираат на нивниото семејство, пријатели, учители и околината во целост. Тие ќе бидат вистински амбасадори на AR, до степен кога многу луѓе ќе ја препознаваат кратенката и ќе го разбираат нејзиното значење.
Што мислите вие на оваа тема?
Пишете ни во коментар.
