Уште кога беше делумно популарен, мобилниот оперативен систем на Microsoft немаше можност да биде „рутиран“, односно да се менуваат многу од неговите функции преку влегување во системските директориуми, што за многумина беше недостаток во однос на iOS (Jailbreak) и Android (Root).

Сега, во време кога Microsoft веќе се откажа од својата мобилна платформа, надградба (треба да биде пуштена наскоро) на еден постар програм наречен “Windows Phone Internals”, му овозможува на корисникот да влезе во системските директориуми и да прави најразлични измени во оперативниот систем. Оваа алатка е дело на дивелопер со име “Heathcliff74” и истата може да се користи за влегување во сите Lumia смартфони со Windows Phone 8 и 8.1, како и Windows 10 Mobile смартфони.

Со оваа надградба на “Windows Phone Internals”, корисникот ќе може со едноставна акција да го отклучи Bootloader-от на својот телефон и воедно да направи и Root. Ова го отвора патот за нови ROM-ови на Windows 10 Mobile, кои би можеле да донесат и најразлични новитети за корисниците на вакви смартфони. Всушност, доколку се нафатат доволно дивелопери, би можеле да видиме и многу интересни изведби на Windows 10 Mobile.

Секако, ова не значи дека треба да отидете до најблиската продавница и да купите Windows смартфон – платформата е веќе мртва и ништо нема да го промени тоа, дури ниту нови ROM-ови развиени од корисници. Но, ова би можело да биде интересно за оние кои веќе имаат “Windows” телефон кој им седи во фиока и кој не го користат подолго време.

Извор: Windows Central, Thurrott, WP Internals

Претходна статијаБидете внимателни – користењето на софтвер со сомнително потекло крие опасности за Вашиот бизнис
Следна статијаSamsung W2018 е импресивен смартфон на преклоп од високата класа